نصائح للشعر الدهني ..

الشعر الدهني ..معاانااة ..كنت أغسل شعري يوم وترك بـ شامبوات طبية أو خالية من السليكون والمواد الضارة .
.بس قريت انه كثرة غسل الشعر بتضره وتفقده فائدةالزيوت اللي يفرزها ..
فـ كييف أتجنب المظهر الدهني المقزز ..
يعني الوحده منااا ..تكشخ وتتجمل ثم آخرتها شعرها يقووطر زييت

لحل المشكلة ..
أستخدم الشامبو الجاف ع يسار الصورة .. Dry Shampoo من Batiste
واحد بلون بني اسمه ..Medium & Brunette
والثاني الزهري أبيض ..Blush ..بريحه خفيفة ..

بداية استخدامي للشامبو الجاف كان من لوش ..
كان صعب واللون الأبيض ماكان يختفي بسرعه مثل ماأشوف في اليوتيوب ..
جلس عندي فتره طويله ثمن رميته ..

رجعت وشريته من بوتس قلت يمكن لأنه سيراي بيختلف الوضع ..
بس للأسف نفس النتيجه كنت بعد بخه ع الجذور أمشطه ..أمسج الشعر بدون فاائده

جربت أمشط الشعر بـالروول ..بسرعه اختفى ونجح معي المنتج ..
وبـ الفعل اختفت الدهوون طواال اليوم وحتى اليوم الثاني ..
تجربتي الناجحة كانت في الشتا ..ماأدري في عز الصيف وش بيصير
هل بيستمر مفعوله في ازالة الدهون أو بيختفي بعد سااعات

والميزة الثانية .. يعطي حجم للشعر ..Volume
لذلك أستخدمه أحيانا في المناسبات مع الفير أو الستريت ..

المكونات
البوتان، الأيزوبيوتان، أوريزا ساتيفا (رايس) نشاء، البروبان، الكحول دينات، عطر (العطر)، الكومارين، الأوجينول، الليمونين، بيوتيل فينيل ميثيل بروبيونال، لينالول، Distearyldimonium كلوريد.

وممكن نستخدم أشياء أخرى موجوده في المطبخ مثل ..
النشا ..بودرة الكاكاو بدون سكر ..
نحط كمية مناسبة في اليد ثم بشويش نفرك الجذوور ..
بصرااحه ماجربتها ..

الطريقة الثانية ..

وضع بيكربونات الصودا مع الشامبو ..
لو بحثتم في قووقل بتتعرفوون على فوائدها ..
منها ينظف فروة الشعر من الدهون ومن تراكمات منتجات الشعر ..القشرة..
الطريقة ..
تقريبا ..ملعقة صغيره مع الشامبو +شوي موية..
الكمية مناسبة لشعري ..
اليوم الثااني ..كل ماشفت المراية انبسطت ...الشعر ماادهن ..
والشعر شكله صحي ولمعه طبيعية ..
بدا يدهن اليوم الثالث ..

فيه البعض يستخدم بيكربونات الصودا كـ شامبو..
وضع مقدار مناسب للشعر مع مويه في انااء ويمسج فيه فروة الشعر ..
ثم بغسل ..ثم الخل أبيض أو خل التفاح
حتى يزيل بقاايا البيكربونات ثم يشطف بموية مقطرة ..

ماقد جربت هـ الطريقة ان شاءالله بجربها تحمست لها ..

طييب متى أستخدمهم ..الشامبو الجاف أو بيكربونات الصودا مع الشامبو ..
على حسب حااجتي ..ممكن مرة بالاسبوع وممكن مرة في الشهر
وممكن يمر شهر مـ استخدمتهم ..

ماأنصح بـ استخدامهم أكثر من مرة في الاسبوع ..الاعتدال مطلوب ..
الافراط والمبالغة لهم عوااقب وخيمة ..
+ننتبه لتاريخ البيكنج صودا ..
اللي في الصورة ينتهي بعد شهر من فتحه لذلك حاطين
مكان تحت الفتحة لتدوين التاريخ ..اليوم ..الشهر ..السنة ..

دمتم بـ جمال ..

  
 

Lush American Cream Conditioner ..

 

 

 

بلسم من لوش ..حبيته جدا جدا ..على كثر تجاربي هذا أشوفه غيير ..

الترطيب ممتاز لشعري + الريحة تثبت للشور الثااني ..
ريحه تفتح النفس ..فانيليا ..فراولة ..عسل ..

أيضا اقتصادي في الاستعمال لأن الفتحة ضيقة وقوام البلسم سميك شوي ..
طبعا طريقته مثل أي بلسم بعد غسل الشعر من الشامبو
يترك على أطراف الشعر من 2-5 دقايق
بعده يشطف بـ الماء ..

المكونات ..
العسل المياه ( أكوا ميل ) ، الفانيليا قرنة تسريب ( الفانيلا planifolia ) ، بروبيلين جلايكول، البرتقال الطازجة ( الحمضيات الحلو ) ، سيتريل الكحول و كبريتات لوريل الصوديوم ، الفراولة الطازجة ( Fragaria vesca ) ، اللانولين، سيتريمونيوم الميثيل ، عطور ، سيتريل الكحول ، الفانيليا مطلقة ( planifolia الفانيلا ) ، سيج كلاري النفط ( المريمية sclarea ) ، زيت الخزامى ( Lavandula hybrida ) ، بنزوين شبيه الراتين ( إصطرك الجاوي ) ، لينالول ، الكومارين

لو دققتوا شوي في المكونات بنلاحظ أغلبها مكونات طبيعية ..
والمنتج خالي من السليكون والبارابين ..
المنتج مناسب لشعري الدهني وأطرافه عادية ..
ولو بحثتم في قوقل ..
بتلقون نااس تذم ونااس تمدح ..
كل وحده وطبيعة شعرها ..

 

 

 

 

 

 

 Neutrogena Oil-Free Acne Wash

غسول نتروجينا لحب الشباب خالي من الزيوت ..

هـ البراند .. جربت أكثر من غسول ومقشر كلها مو مرره مع بشرتي
لأنها تسبب جفاف اذا استخدمتها بشكل يومي ..

وغير كذا ماشفت فيها ميزة .. الا تنظيف البشرة ..

وفي أحد الأياام قريت معلومة من د\ عمر شمس الدين ..

عن هـ المنتج بأنه يقضي على حبوب الشباب لوجود حمض الساليسيليك

وشريته وتركته لحين الحاجة ..

وقبل اسبوع أو أكثر ... تحسست بشرتي ..

واذا تحسست يعني حبوب كبيرة تحت الجلد وفوقها وطبعا لونها أحمر ..

مباشرة استخدمت الغسول .. استخدمته 2 في اليوم ..

لمدة 3 أياام تقريبا ..

الحبوب اختفت ماشاءالله .. صدق أو لا تصدق

بشرتي رجعت لطبيعتها ..

بس الشي السلبي .. سبب الجفاف لبشرتي ..أثناء استخدام الغسول ..

ولحل المشكلة .. كنت أرطب بشرتي بعد كل وضوء ..

من تجربتي .. حبيت المنتج .. رخيص وفعاال ..

وصرت أستخدمه 2 في الاسبوع تقريبا ..

سعره ماأذكره .. بس أتوقع في العشرين أو الثلاثيين ..

|| لحد يتوقع مني أعرف سعر أي منتج .. بيني وبين حفظ الأسعار كيميا ..
اذا ذكرت سعر أي منتج .. أحس بـ انجااز ..||

 

 

 

L'Occitane | Aromachologie Refreshing Aromatic Deodorant

ديودرنت .. مزيل رائحة العرق من لوكستيان ..

من الموقع ..

يتكوّن مزيل الرّائحة هذا من الزيوت العطريّة المستخرجة من الليمون الحامض والهال واليوكاليبتوس، وهو مزيج يساعد على إزالة التوكسينات والتلوّث كما أنّه يزيل الرّوائح ويطهّر الجسم ويساهم في إبقاء البشرة جافّة كلّ النّهار.

غير مناسب للاستعمال خلال الحمل أو الفترة اللاحقة به

تجربتي ..

رائحته خفيفة ..مثل الليمون واضح جدا ..

قوامه خفيف مثل بيزلين .. سيباميد ..يستمر لساعات محددة .. اذا فيه نشااط ..أو الطقس حاار ..

بس في هـ الأجواء جييد ممكن يستمر يوم كامل ..

يختلف عن البقية في شي واحد .. يجف بسرعة بعد مده على الجلد ..

بكذا مـ يؤثر على الملابس ..

سعره 109 رياال ..<~ سعره ع العلبة ..
مع الاستعمال اليومي ممكن ينتهي بعد شهر ..

لن أعيد الشرااء .. أفضل سيباميد عليه أكثر ..

* تمنيت ذكر عدم استخدامه للحامل من البائع ..عند الشراء ..
ولا أدري وش سبب المنع ..

شامبو سيبوديتوكس ..

للشعر الدهني ...التوازن الحمضي 6.5 ... شامبو لاعادة توازن افراز الدهون بفروة الرأس يحتوي على مستخلصات الأعشاب البحرية أسباراجوبسيس أرمانا وأرنيكا مونتانا ..
يزيل الدهون الزائدة التي يتم افرازها كما يعمل على توازن وظائف فروة الرأس ..
كما تعمل تلك التركيبة الخاصة من معادن وعنااصر أوليجو على تغذية فروة الرأس بالأكسجين
كما أنها تمنح الشعر حيوية فائقة وحجما وكثافة رائعتين ..

تجربتي ..
ماشفته عالج الدهون أو وازنها .. نفس أي شامبو اليوم نظيف بكرا يبدا يدهن ..
يمكن العيب من شعري وخاصة من قداام ..بصرااحة أشوف شعري مختلط لوول زي البشرة المختلطة ..
من قدام دهني ومن ورا عاادي ..
من ناحية الفوليوم بالفعل يعطي ومناسب لو كنت معزومة وبضبط شعري بالفير أو غيرة ..
اللي حمسني أشترية وجود الأعشاب البحرية ذكرني بشامبو BIG من LUSH
بس هذاك يعطي فوليوم أكثر ..
بعد استخدامه مثل أي شامبو طبي أو طبيعي يفضل حماام زيت ع الأطراف أو بلسم
لأن الشعر بيصير جااف جدا ..
سعره 75 ريال تقريبا ..
من الصيدلية ..

ذوقي في الأرواج أميل أكثر للورديات الفاتحة والوسط ثم النيود ثم الكورال ..
الأحمر ودرجااته مااآخذه الا اذا شدني مثل هـ الاثنين ..

الروجين فيهم شبه كبيرمن ميبليين وفور ايفر

وبنفس الوقت لونهم جمييل جدا .. أنثوي .. يحلون الفيس .. وماانحتااج معااهم ميكب الا شي بسيط
مثل بي بي كريم أو مااشابه .. ماسكارا .. ترتيب الحواجب .. وشوي بلاشر ع تفااحة الخد
وبرأيي ماايصلحون للصبح .. من العصر وطاالع ..

من تحت .. من فور ايفر..

Make Up For Ever – Rouge Artist Intense Mat #6

  

توتي لذيذ .. الفنش ..مات .. دافئ .. مناسب للشتا وبرأيي كل السنة بيمشي ..
تغطية كااملة ومع انه مطفي بس شفايفي مااتقشرت ..ويفضل قبله مرطب ..
واذا كاانت الشفايف جافة ومتقشره لابد من مقشر ثم ترطيب
لأن الروج المطفي يبين العيوب ..
عندي بقية الدرجاات ..من 1الى 6 .. لو حااابين تكلمت عنها ..
سعره \ 110ريال

الثاني.. Maybelline color sensational 540
hollywood red
المجموعه كولور سنسايشنال فيها ألواان جدا جمييلة وسعرها منااسب
الروج كريمي .. واللون قابل للبناااء ..يعني ممكن نكتفي بطبقة خفيفة بيعطينا لون طبيعي .. وممكن نزيد ..
لونه أحمر يميل للوردي أما روج فور ايفر يميل للبنفسجي ..
سعره \38 ريال تقريبا

Sephora Kohl Waterproof Eyeliner

قلم كحل من سيفورا ..ووتر بروف .. ضد الموية ..

جمييييييييل جدا ..ليش ؟؟

لأنه كريمي وسهل المد ع العين .. ممكن أكتفي بخط ناعم ع حدوود الرمووش

وممكن .. أزين .. الكحل المجنح .. الكاات آيز أو سمووكي ..

وش حبيت يجي ..

الميزة الثانية والمهمة .. مااايسيح مع جفوني الدهنية .. يمكن أحيانا يطبع شوي للرموش السفلية

يعني شي بسييط مو ملحوظ.. مو كأنه هاالات ..
وهذا يصير غالبا في الدواام ..يمكن ..لأني أتحرك كثير وأتكلم كثيير وأضحك كثيير
فـ المفروض أثبته بـ الشدو ..

الجهه الثانية بتشوفون مساحة .. لدمج الكحل .. حلييوه ..بس أفضل الفرش لأن تنظيفها صعب شوي ..
وممكن تستخدم لمسح الكحل بعد تبليلها بمزيل مكياج العيون <~ ماحبيت كذا

عيبه بعد ماتخلصيين الكحل قرب يخلص .. من ناااحيتي .. قلم الكحل لازم أبريه قبل الاستخداام
لأن عيوني حسااسة .. بتدمع وبيخرب كل شي ..

وشي صحي بري القلم لأن العيين بطبيعتها حسااسة ..

سعره في الستيين تقريبا ..طبعا من سيفورا

MAC 'Indianwood' paint pot

شدو كريمي من ماك .. لونه ننحااسي ..

يتوزع ع الجفن المتحرك بالاصبع أو الفرشاة ..

أفضل الاصبع .. يمد ويتوزع بسهوله .. ويعطي تدرج للشدو ..

يعني كأنك تعباانه ع الشدو .. ممكن نكتفي بكذا مع كحل وماسكرا ..

وممكن نمد ع كسرة العين شدو بني مطفي .. وهذا اللي غالبا أسويه ..

وممكن ندمج معه شدو بلون مناسب ع طرف أو منتصف الجفن الثابت ..
وأحيانا أحط منه مسحه خفيفة ..يعطي لوك جميل للعين ..
ولونه مشابه لشدو ماك الباودر Woodwinked
للأسف نسيت أصور وتشوفون التشاابه ..ان شاءالله لاحقا ..

والبعض يستخدمه كقاعده لشدو بااودر ..

عموما ..ه الاثنين أستخدمهم لو بغيت ميكب سريع وواااثقه بيصيير حلو ..
الروج أفضله نيود مع شوي بلاشر ..

السعر يمكن.. 110 ريال ..

ويمكن تغير سعره